Platforma për dialogun me Serbinë, në mungesë kuorumit, nuk ka kaluar në Komisionin për Punë të Jashtme, Diasporë dhe Investime Strategjike, ndërsa me 5 vota për dhe 4 vota kundër, projektligji për detyrat, përgjegjësit dhe kompetencat e delegacionit shtetëror në procesin e dialogut me shtetin fqinj kaloi në lexim të dytë në seancën e radhës.
Duket se platforma për dialog u kritikua ashpër nga anëtarët e partive opozitare, duke theksuar se ky dokument nuk e ruan shtetësinë dhe sovranitetin e Kosovës karshi dialogut me Serbinë.
Ndërkohë që kryetarja e komisionit, Vjosa Osmani, kishte kritika të shumta për platformën e dialogut me Serbinë, pasi saj, ka probleme të mëdha pasi nuk e mbron pavarësinë dhe shtetësinë e Kosovës.
Nga ana tjetër Osmani ka bërë me dije se kjo platformë nuk e trajton rolin e institucioneve tjera shtetërore, siç thotë ajo, presidenti nuk ka të drejtë të krijojë pozicione, por vetëm t’i mbrojë pozicionet e qeverisë. Sipas saj, në platformën e dialogut është një pikë që Kosova pa arritur marrëveshje me Serbinë, nuk mund të anëtarësohet në organizatat ndërkombëtarë dhe agjencitë e huaja. Kjo sipas saj, është e dëmshme dhe e papranueshme.
Ndërsa për deputetin e VV-së, Glauk Konjufca, në këtë platformë qeveria nuk pozicionohet qartë karshi pozicioneve që i ka presidenti në këtë platformë.
Ndërkohë që deputetja nga radhët e PDK-së, Evgjeni Thaçi, kishte akuza ndaj anëtarëve të këtij komisioni, pasi sipas saj, në asnjë moment nuk është thënë se do të ketë ndarje dhe shkëmbim territoresh.
Ndërsa, nënkryetarja e komisionit, Time Kadrijaj, tha se kjo platformë dhe ky ligj e siguron Kosovën e 17 shkurtit me kufijtë, territorin dhe sovranitetin.
