Deputeti demokrat, Kreshnik Çollaku ka reaguar pas shqetësimit të ndërkombëtarëve lidhur me situatën e krijuar nga opozita në parlament. Në një deklaratë për mediat, ai tha se kjo situatë është në interes të dy personave që duan të mbajnë peng Shqipërinë, në marrëveshje me njëri-tjetrin.
“PD ndan shqetësimin me partnerët amerikanë dhe britanike, se “mosfunksionimi i përsëritur i ( Parlamentit) vërejtur gjatë muajve të fundit, nuk është në interes të Shqipërisë”.
Siç e kemi deklaruar dhe më parë, situata në Parlament është në interesin e dy personave që duan të mbajnë peng Shqipërinë, njëri që i fshihet drejtësisë dhe tjetri që kërkon t’i ikë përgjegjësisë për situatën ekonomike dhe aferat korruptive ku është zhytur qeveria e tij. Prandaj, në marrëveshje me njëri-tjetrin, në seanca ofrojnë shfaqe të tilla, ndërsa fshehurazi shkojnë në komisionet e Lindita Nikollës”, thotë ai.
Sipas tij, situate e krijuar pamundëson llogaridhënien e kryeministrit Rama për aferat korruptive, ndërsa pengoi dhe diskutimet me rëndësi mbi projektbuxhetin.
“Siç u pa dhe në seancën e fundit, shqiptarët u privuan nga mundësia për të kuptuar se çfarë ndodh me paratë e tyre, si do të përdorën ato në buxhetin e ardhshëm apo çfarë marrëveshje ka bërë Edi Rama për refugjatët.
Edi Ramës nuk i intereson të japë llogari. Edi Ramës dhe Sali Berishës nuk u intereson vetingun në politikë, as hapja e listave dhe as vota e diasporës. Edi Ramës dhe Sali Berishës u intereson kaosi për të mbijetuar në politikë”, tha Çollaku.
Ndërkombëtarët ngritën shqetësimin e tyre mbi situatën e krijuar gjatë seancës plenare të së hënës, ku deputetët demokratë ndezën tymuese në sallë.
