Krim pasioni në Bruksel, e dashura e drejtuesit të lartë të Goodyear arrestohet për vrasjen e gruas së tij

Chris Delaney, një drejtues i lartë në kompaninë e njohur Goodyear, është larguar nga pozicioni i tij pas një ngjarjeje tragjike që ka tronditur opinionin publik. Delaney, që prej vitit 2017 drejtonte operacionet e Goodyear për rajonin e Evropës, Lindjes së Mesme dhe Afrikës, u përfshi në një hetim penal pasi bashkëshortja e tij, Carmel Delaney, u gjet e vrarë në apartamentin e tyre në Bruksel më 17 mars. Autoritetet belge arrestuan më vonë asistenten e tij dhe të dashurën e dyshuar, Greet Vandeput, e cila akuzohet për vrasje me thikë.

Hetimi fillimisht u përqendrua në pistën e një grabitjeje të dështuar, por më pas doli në dritë lidhja jashtëmartesore mes Delaney dhe Vandeput, e cila gjithashtu ishte e martuar. Provat kyçe përfshinin orë luksoze të vjedhura, të cilat policia i gjeti të fshehura në një stallë ku Vandeput mbante kuajt e saj. Një mikeshë e saj kishte ngritur dyshime pas një bisede konfuze, çka çoi në zbulimin e të vërtetës. Autopsia konfirmoi se Carmel ishte goditur katër herë me thikë në gjoks dhe trup.

Delaney është marrë në pyetje si dëshmitar dhe nuk është akuzuar për përfshirje në vrasje. Kompania Goodyear konfirmoi se as ai dhe as Vandeput nuk janë më pjesë e stafit, duke theksuar se Delaney nuk ka marrë asnjë paketë largimi. Tragjedia ka shkaktuar tronditje të madhe, pasi çifti Delaney ishte i njohur për jetën e tyre ndërkombëtare dhe lidhjen e fortë, duke punuar dhe jetuar në disa shtete para se të vendoseshin në Bruksel.

/vizionplus.tv