Kremlini: Traktati me Korenë e Veriut parashikon “bashkëpunim strategjik” në të gjitha fushat

Kremlini tha sot se traktati Rusi-Kore e Veriut i nënshkruar në qershor nga presidenti rus Vladimir Putin dhe lideri i Koresë së Veriut Kim Jong Un është “i qartë” dhe parashikon “bashkëpunim strategjik” në të gjitha fushat.

“Formulimi i traktatit nuk kërkon ndonjë sqarim, është e qartë,” tha Dmitry Peskov, zëdhënësi i presidencës ruse.

Ushtria e Koresë së Veriut shpërtheu sot me dinamit pjesë të një rruge që dikur përdorej për shkëmbime ndërkufitare me Korenë e Jugut, sipas Seulit, i cili u përgjigj me të shtëna paralajmëruese, duke rritur sërish tensionet mes dy vendeve armiqësore.

Rusia dhe Koreja e Veriut kanë forcuar ndjeshëm marrëdhëniet e tyre që kur Moska nisi sulmin e saj ndaj Ukrainës në shkurt 2022, duke krijuar një aleancë anti-perëndimore.

Pheniani akuzohet nga Perëndimi se ka furnizuar me predha dhe raketa ushtrinë ruse.

Kjo qasje u demonstrua nga vizita në Phenian në qershor nga presidenti rus dhe nënshkrimi i një traktati të bashkëpunimit strategjik që parashikon në nenin 4 “ndihmë të menjëhershme ushtarake” në rast të një sulmi të armatosur.

“Gjëja më e rëndësishme është se ky traktat parashikon bashkëpunim strategjik në të gjithë sektorët, duke përfshirë edhe atë të sigurisë”, theksoi sot Peskov.

Zëdhënësi i Kremlinit Dmitry Peskov tha gjithashtu se Moska do të japë më shumë detaje mbi një traktat të planifikuar me Iranin kur të finalizohet./vizionplus.tv