Ministri i Punëve të Jashtme i Greqisë Nikos Kotzias, nis sot vizitën e tij dyditore në Shkup. Kjo vizitë konsiderohet shumë e rëndësishme për negociatat mes dy vendeve për çështjen e emrit.
Në shenjë simbolike Kocias do të udhëtojë me një avion të linjës Athinë-Shkup, fluturim direkt për herë të parë pas 12 vitesh ndalimi. Ai do të ndaloje në aeroportin, të cilit tashmë i është hequr emri “Aleksandri i Madh”.
Takimi me krerët maqedonas do të zhvillohet duke u fokusuar në 7 pikat kryesore ku përfshihen emri, akronimet, referencat irredentiste, gjuha etj.
Nga ana tjetër Ministri i Jashtëm i Maqedonisë Nikola Dimitrov tha pak ditë më parë se ai ka në duart e tij propozimet e Greqisë për emrin.
“Gorna Makedonija” -Maqedonia e Epërme duket se do të jetë emri për të cilin do të bien dakord të dy palët, gjë e cila do t’i japë fund konfliktit 27 vjeçar për emrin mes Greqisë dhe Maqedonisë.
Megjithatë mbetet me pikëpyetje, nëse Maqedonia bie në ujdi me emrin e propozuar.
Pavarësisht se të dy kryediplomatët kanë qëndrime të ndryshme, pala maqedonase kërkon një zgjidhje të shpejt me qëllim anëtarësimin në NATO.
Ndërkohë më datë 30 mars, dy kryediplomatët Nikos Kotzias dhe Nikola Dimitrov do të zhvillojnë takimin e radhës në Vjenë, në praninë e ndërmjetësuesit të OKB-së Matthew Nimetz.
