Çështja e targave të automjeteve ka mjaftuar për të ndezur tensione te reja në Kosovë. Qeveria në Prishtinë kujton se vendimin që ka hyrë sot në fuqi e ka të mbështetur në marrëveshjen e arritur mes dy vendeve që në vitin 2011, gjatë të ashtuquajturit dialog teknik.
Në një lidhje direkte me edicionin qendror në “Vizion Plus”, Adriatik Kelmendi, gazetar dhe analist në “Klan Kosova”, sqaroi se kjo që ka ndodhur sot konstaton në marrëveshjen e arritur në Bruksel në 2011-ën, për lëvizjen e lirë, në kuadër të dialogut ndërmjet Kosovës dhe Serbisë.
“Do të duhet të shënonte një marrëdhënie normale, por mes Serbisë dhe Kosovës nuk ka një marrëdhënie normale. Kjo konstaton në marrëveshjen e arritur në Bruksel që në vitin 2011, por kishte një afat prej 5 vjetësh për zbatimin e saj nga të dyja palët. Pala serbe kishte vazhduar të lejonte kosovarët të hynin me makina, por duhet të mbulonin pjesën e targave, duke vendosur traga kalimtare. E njëjta gjë nuk ka ndodhur për mjetet nga Serbia në territorin e Kosovës. Pala kosovare ka pranuar që këtë afat 5-vjeçar ta shtyjë edhe për 5 vjet të tjera. I ra qeverisë Kurti që ta zbatojë sepse i skadoi efekti 10-vjeçar.”
I pyetur për ndikimin që kjo përplasje mund të ketë në raportet mes Kosovës dhe Serbisë, Kelmendi tha:
“Serbët do ta shfrytëzojnë këtë për të ngritur zërin, për të kërkuar dhe akuzuar Prishtinën që po i bën instruksione dialogut. Kjo që ka ndodhur sot është rezultat i vetë dialogut të Bruskelit, arritja e një marrëveshjeje që është zbatuar njëanshëm nga Prishtina, por nuk është përfillur nga Serbia; i duhet treguar edhe Serbisë që Kosova është shtet dhe nuk mund të mos marrë përsipër të moszbatojë dhe ato marrëveshje që janë arritur, duhet të kuptojë që me dialog mund të arrihet marrëveshje, përparim, por jo të nxitë qytetarët.”
