Kosova miraton fondin e Ballkanit

Parlamenti i Kosovës me 89 vota pro dhe dy kundër, miratoi këtë të enjte projektligjin për ratifikimin e marrëveshjes për themelimin e fondit të Ballkanit Perëndimor. Ministri i Jashtëm kosovar Enver Hoxhaj, tha se kjo marrëveshje është derivat i procesit të Berlinit, që përmes pakteve ndërqeveritare të themelohet një qendër që do ta ndihmojë rininë e rajonit të bashkëpunojnë.

Një reagim erdhi edhe nga shefi i diplomacisë shqiptare, Ditmir Bushati, që e cilësoi këtë një lajm të mirë. “Kuvendi  ratifikoi marrëveshjet e nënshkruara në Pragë dhe në Paris, për krijimin e fondit të Ballkanit perëndimor dhe zyrës rajonale për bashkëpunimin rinor. Të dyja këto nisma rajonale të rëndësishme do të kenë selinë e tyre në tiranë. Një dëshmi tjetër e rolit të posaçëm të Shqipërisë dhe përkushtimit tonë për më shumë siguri, mirëqenie dhe orientim të qartë euro-atlantik të rajonit”, u shpreh Bushati.