Tashmë edhe zyrtarisht, Kosova ka hapur ambasadën e saj në Jerusalem duke mos iu përgjigjur thirrjeve të Brukselit zyrtar për të hequr dorë nga vendimi, pasi statusi i kryeqytetit të njohur nga Uashingtoni, mbetet ende i pazgjidhur.
Ministria e Punëve të Jashtme dhe Diasporës në një deklaratë shprehet se këto zhvillime janë në zbatim të marrëveshjes së 4 shtatorit për normalizimin e marrëdhënieve ekonomike mes Kosovës dhe Serbisë, të ndërmjetësuar nga SHBA.
MINISTRIA E PUNEVE TE JASHTME DHE DIASPORES, KOSOVE
“Vendosja e pllakës dhe flamurit shtetëror në Ambasadën e Kosovës në Izrael reflekton përkushtimin e Qeverisë së Kosovës për të përmbushur zotimin e dhënë për vendosjen e misionit diplomatik në Jeruzalem. Ambasada e Republikës së Kosovës në Jeruzalem do të përkushtohet fuqimisht për të rritur bashkëpunimin bilateral dhe për forcimin e subjektivitetit ndërkombëtar të shtetit të Kosovës.”
Aktualisht Ines Demiri, është e ngarkuara me punë e Kosovës në Izrael dhe pritet të jetë ambasadorja e parë që do të kryesojë trupin diplomatik. Në fund të vitit 2017, presidenti i atëhershëm amerikan, Donald Trump, njoftoi vendimin për njohjen e Jerusalemit si kryeqytet të Izraelit, duke zhvendosur edhe ambasadën nga Tel Avivi.
Vendimi u pasua me reagime të shumta ndërkombëtare, pasi shumica e fuqive botërore nuk e njohin sovranitetin e Izraelit mbi të gjithë Jerusalemin dhe thonë se statusi përfundimtar i tij duhet të vendoset përmes negociatave për paqe në Lindjen e Mesme.