Teksa bëri betimin si president i Serbisë, Aleksandër Vuçic premtoi të ruajë integritetin e vendit përfshirë edhe Kosovën. Presidenti kosovar Thaçi i është përgjigjur nga Kroacia, duke e cilësuar këtë deklaratë për konsum të brendshëm.
“Nuk është diçka e re që dëgjojmë nga Beogradi por Kosova është Kosovë e Serbia Serbi. Jemi dy vende të pavarura dhe sovrane, edhe presidenti i Serbisë e di shumë mirë që Kosovë është shtet i pavarur dhe sovrane, e njohur nga 114 shtet të botës, në të njëjtën kohë pavarësisht kësaj deklarate për konsum të brendshëm në Serbisë”
Thaçi është takuar me presidenten kroate Kolinda Grabar-Kitarovic, me të cilën pati edhe një konferencë për shtyp.
“Kosova do të vazhdojë procesin e integrimit euroatlantik, për liberalizimin e vizave dhe themelimin e ushtrisë se Kosovës. Ushtria do të jetë në përputhje me kriteret e standardet e NATO-s, multietnike, në shërbim të paqes”.
Presidentja kroate tha se FSK duhet transformuar në ushtri përmes ndryshimeve kushtetuese.
“Kroatët e mbështesin pavarësinë e Kosovës dhe integrimin e saj. Republika e Kroacisë do të vazhdojë ta mbështesë Kosovën për transformimin e FSK-së, e cila duhet të transformohet sipas kushtetutës”.
Presidenti i Kosovës tha gjithashtu se Kosova është e angazhuar për dialog më Serbinë për të mbyllur çështjet e hapura.
