Sot Kosova mund të jetë edhe më afër anëtarësimit në Këshillin e Evropës. Asambleja Parlamentare do ta shqyrtojë raportin për anëtarësimin Dora Bakoyannis.
Por, do të duhen 2/3 e votave të deputetëve nga 46 vende anëtare të kësaj organizate që Prishtina të kalojë edhe këtë etapë drejt anëtarësimit.
Komiteti për Politikë dhe Demokraci në Këshillin e Evropës, më 27 mars, miratoi raportin Bakoyannis, ku rekomandohet që Kosova të anëtarësohet në Këshillin e Evropës.
Ndërkohë nëse Kosova merr dritën jeshile këtë të martë atëherë raporti do të kaloj në Këshillin e ministrave , i cili është vendimi përfundimtar për anëtarësimin.
Konkluzioni i Këshillit të Ministrave pritet të jepet në mesin e muajit maj. Kosova aplikoi për anëtarësimin në vitin 2022 , por vonesa e zbatimit te vendimit të Gjykatës Kushtetuese për Manastirin e Deçanit u bë pengesë.
Megjithatë, kjo çështje mori rrugën e zgjidhjes kur Qeveria e Prishtinës vendosi në mars t’ia dorëzojë pronësinë e 24 hektarëve tokë Kishës Ortodokse Serbe. /vizionplus.tv
