Koreja e Veriut nuk heq dorë nga raketat balistike, pavarësisht se në media ka publikuar shkatërrimin e uzinave që përdoreshin për ndërtimin e tyre.
Mëngjesin e kësaj të shtune, vendi komunist ka testuar sërish disa raketa me rreze të shkurtër të cilat u nisën nga gadishulli Hodo e përfunduan në detin e Japonisë. Ky është provokimi i parë i vendit Komunist që pas testimit të raketës balistike ndërkontinentale në vitin 2017, që nxiti reagimin e ashpër të SHBA-se dhe të gjitha vendeve të tjera në botë.
Lajmin e ka konfirmuar Shtabi i përgjithshëm i Ushtrisë së Koresë së Jugut.
Mediat amerikane shkruajnë se ky është testi i parë i një rakete balistike pas disa përpjekjeve dhe takimeve të presidentit Trump për të bindur Kim Jong Un të heqë dorë nga programi bërthamor. Duket se reagimi i Phenianit është një kundërpërgjigje ndaj këmbënguljes së Uashingtonit për sanksionet ekonomike, të cilat do të mbeten në fuqi deri sa Kim Jon Un të heqë dorë nga prodhimi i raketave balistike.
Nga ana tjetër, dy takimet e Trupm me Kim Jong Un nuk kanë dhënë asnjë rezultat për arritjen e një marrëveshjeje për denuklearizimin e Gadishullit Korean.
Administrata e presidentit amerikan sugjeroi mundësinë e një samiti të tretë, por Koreja e Veriut ka vendosur kushtin për largimin e sekretarit amerikan të Shtetit, Mike Pompeo nga negociatat.
Ende nuk ka një reagim nga Moska për testimin e raketës balistike nga vendi komunist, pas takimit të Kim Jong Un me Vladimir Putin rreth 2 javë më pare.
Putin tha ne atë takim se Koresë së Veriut i duhet “garanci ndërkombëtare për sigurinë” përpara se t’i japë fund programit bërthamor.
