Orët e fundit janë shtuar dyshimet se Koreja e Veriut do të kryejë një test të ri bërthamor, i 6-i që nga viti 2006. Pamjet nga sateliti të vendit prej nga kryhen testet, tregojnë rritje te aktivitetit në zonë, çka do të thotë se Pheniani është në përgatitjet e fundit.
Ndërsa SHBA ka dërguar disa luftanije në Paqësor drejt Gadishullit Korean, Koreja e Jugut beson se SHBA do të konsultohet me të përpara se të kryejë ndonjë sulm ndaj veriut.
Presidenti Trump ka paralajmëruar se nuk do të tolerojë asnjë provokim, ndërsa zyrtarë amerikanë janë shprehur se administrata e tij e ka fokusuar strategjinë në sanksione më të ashpra ekonomike.
Kina, aleate e Koresë, duket se ka ndryshuar qëndrim dhe përmes ministrit të Jashtëm, Wang Yi, ka paralajmëruar se tensionet nuk mund të ulen përmes forcës ushtarake, por përmes bisedimeve. Një gazetë kineze bënte thirrje gjithashtu, që Pheniani të ndalë programin bërthamor në këmbim të mbrojtjes kineze.
Kryeministri japonez Shinzo Abe është shprehur se Koreja e Veriut mund të ketë kapacitete të lëshojë raketa me gaz sarin. Sipas disa mediave, testi bërthamor mund të ndodhë në 15 prill, që shënon 105 vjetorin e lindjes se themeluesit te vendit, ish liderit suprem Kim Il Sung.
