Policia e Tiranës ka zhvilluar kontrolle në zonën e ish-Bllokut për të verifikuar respektimin e nivelit të lejuar të zhurmave dhe orarit të lejuar për muzikën në ambientet e hapura.
Sipas njoftimit zyrtar, në kuadër të masave sensibilizuese janë organizuar takime informuese me administratorë subjektesh dhe persona fizikë, aktiviteti i të cilëve gjeneron zhurmë nga muzika, kryesisht në zonën e ish-Bllokut.
Njëkohësisht, strukturat e sigurisë publike të Drejtorisë Vendore të Policisë Tiranë, në bashkëpunim me Komisariatin e Policisë Nr. 2, kanë kryer kontrolle të vazhdueshme në terren, bazuar në hartëzimin e zonave me ndotje akustike.
Gjatë kontrolleve janë përdorur matës të posaçëm të zhurmës për të testuar ambiente dhe subjekte, të hapura dhe të mbyllura, me qëllim verifikimin e respektimit të kufijve të përcaktuar në legjislacionin për administrimin e zhurmës në mjedis.
Sipas Policisë, matjet e kryera kanë rezultuar brenda kufijve të lejuar.
Përveç nivelit të zhurmës, efektivët kanë monitoruar edhe respektimin e orarit të lejuar për muzikën në ambientet e hapura në zonat e banuara, i cili është nga ora 11:00 deri në orën 24:00.
Policia e Tiranës bën të ditur se kontrollet dhe monitorimi do të vijojnë edhe në ditët në vijim, me synim garantimin e rendit publik dhe qetësisë për qytetarët dhe vizitorët, ndërsa u bën thirrje qytetarëve të denoncojnë çdo rast shkeljeje, duke garantuar reagim të menjëhershëm në përputhje me ligjin.
/vizionplus.tv
