Kontrolle për sende të ndaluara janë zhvilluar në burgun e Shkodrës, Peqinit dhe Durrësit. Sipas njoftimit të Drejtorisë së Burgjeve kontrollet janë ushtruar në godinat e banimit dhe ambientet e përbashkëta të institucionit.
Bëhet me dije se gjatë kontrollit në IEVP Peqin, në ambientet e dusheve, janë gjetur dhe sekuestruar 2 aparate celularë, konkretisht: 1 celular “Samsung” ngjyrë e bardhë dhe 1 celular “Redmi” ngjyrë e zezë.
Ndërkohë në burgun e Shkodrës, gjatë kontrollit fizik të të paraburgosurit G.Z., është konstatuar dhe sekuestruar 1 celular “iPhone”, së bashku me karikuesin. Personi është veçuar menjëherë dhe për rastin është hartuar raport incidenti. Gjithashtu, në ambientet e përbashkëta janë gjetur edhe 2 aparate celularë të tjerë të tipit “iPhone”.
Po ashtu, kontrolle janë ushtruar edhe në ambientet e paraburgimit të Durrësit, ku është gjetur një aparat celular i llojit iPhone, ngjyrë e zezë, poshtë jastëkut të të paraburgosurit E. C., i cili ka pranuar se aparati celular është në pronësi të tij.
Po në godinën “A” gjatë kontrollit janë gjetur dy USB, për të cilat janë kryer procedurat përkatëse të sekuestrimit dhe administrimit si sende të ndaluara.
Për të gjitha rastet është hartuar dokumentacioni përkatës, përfshirë procesverbalet e bllokimit dhe dorëzimit të sendeve të ndaluara.
Materialet procedurale i janë referuar Agjencisë për vijimin e veprimeve të mëtejshme procedurale, në përputhje me legjislacionin në fuqi.
