Policia e Gjirokastrës ka arrestuar në flagrancë një 19-vjeçar, i cili dyshohet se ka plagosur me thikë një të ri pas një konflikti për motive të dobëta.
Sipas njoftimit zyrtar të Policisë, në pranga ka rënë shtetasi A. B., 19 vjeç, banues në fshatin Asim Zenel. Gjatë konfliktit, ai ka goditur me mjet prerës (thikë) shtetasin E. G., 24 vjeç, banues në Gjirokastër.
I plagosuri është transportuar në spital, ku ndodhet jashtë rrezikut për jetën.
Ndërkohë, hetimi ka nisur edhe për shtetasin H. H., 18 vjeç, banues në Gjirokastër, i cili akuzohet për veprën penale “Moskallëzimi i krimit”. Sipas policisë, ai dyshohet se ka qenë i pranishëm gjatë konfliktit, por nuk e ka kallëzuar ngjarjen pranë organeve të rendit.
Hetimet për zbardhjen e plotë të rrethanave të ngjarjes vijojnë.
