Koncerti i romancave shqiptare
Në një vend tjetër të botës koncerte të këtij lloji do të kushtonin shumë, por në Tiranë krijuesit e romancave dhe muzikës së dhomës, duan vetëm të ndajnë me publikun pa asnjë kosto këto vepra të reja.
Në një kohë kur dëgjohet më së shumti muzikë e huaj, në këtë cep të kryeqytetit, në një sallë koncertesh si kjo e Universitetit të Arteve jehon muzika shqiptare e kompozitorëve si Endri Sina, Vaso Tole, Dorian Cene, Haig Zakarian e Isak Shehu.
Koncerti i romancave shqiptare në këtë edicion të 11-të sjellë 15 krijime që nuk i keni dëgjuar më herët, me tekste nga shkrimtarë si Lasgush Poradeci, Xhevahir Spahiu e Dritëro Agolli.
Kompozitorët, pianistët e sopranot shqiptare e ftojnë publikun që të duartrokasë romancat shqiptare mbrëmjen e kësaj të mërkure në sallën e Koncerteve në Universitetin e Arteve.
