Komisioneri Publik nuk ankimon vendimin për Olsian Çelën

Komisioneri Publik  ka vendosur që të mos e ankimojë vendimin e Komisionit të Pavarur të Kualifikimit për Olsian Çelën, i cili është kandidat për Prokuror të Përgjithshëm.

Këshilli i Lartë i Prokurorisë të hënën ka shtyrë mbledhjen për të miratuar listën e kandidatëve për kryeprokuror. Shkak u bë Olsian Çela pasi kaloi Vettingun, por Komisioneri Publik nuk e kishte apeluar dhe afati i fundit për ta bërë këtë ishte dita e hënë.

Ndërkohë këtë të mërkurë pritet që të miratohen kandidatët që plotësojnë kushtet ligjore për të vazhduar më tej garën. Më pas do bëhet pikëzimi i kandidatëve dhe tre prej tyre do renditen sipas këtij vlerësimi, e do t’i dërgohen kuvendit për votim.

Përveç Olsian Çelës, janë edhe tre kandidatë që kanë shprehur interes për këtë post, Arta Marku, Fatjona Memçaj dhe Lulzim Alushaj.