I ftuar në Spotlight nga Alban Dudushi, në Vizion Plus, gazetari Bledian Koka lidhur me aktivitete e mbajtuar ditën e djeshme ku Partia Socialiste dhe Partia Demokratike hapën zyrtarisht fushatën, u shpreh se kishte disa kritika për mitingun e Bashës. Nga ana tjetër, sipas tij, prezantimi i Ramës ishte si ceremoni varrimi e Rilindjes.
“Sigurisht, unë jam kritik për atë çfarë ndodhi në mitingun e Partisë Demokratike. Nuk duhej të ndodhte ajo, kur ti e di që përballë, qytetarët e tu, të cilët nuk i mbron dot, kanë kundërshtarin tënd që ti e anatemon si njeriun që e ka braktisur dhe nuk e ka ndihmuar përballimin e situatës. Unë këtu jam kritik. Nuk më pëlqeu. Nga ana tjetër, hipokrizia qëndron tek pala tjetër. Pra, një shtet i cili e përdor vaksinën si një mjet për fushatë elektorale. Një njeri që e nis fushatën pasi ka siguruar 1 milionë vaksina kineze ditën që do të çelë fushatën dhe vjen si triumfator në Tiranë. Për të mos thënë pastaj, që në analizën e përgjithshme, ajo që ndodhi tek PS-ja u duk si një ceremoni varrimi e Rilindjes dhe kjo tjetra ishte një çështje fryme.”
