Në një kohë që presidenti Ilir Meta ka paralajmëruar tubim në 2 mars, ministri i Mjedisit dhe Turizmit, Blendi Klosi tha se rikthimi i protestave do të ishte e dëmshme për turizmin. Në një intervistë për emisionin “7 pa 5”, Klosi tregoi sesi vitin e kaluar protestat e dhunshme të opozitës ulën numrin e turistëve.
“Protestat kanë efekt negativ tek turizmi. Vjet ne patëm një rritje të turistëve të huaj në Shqipëri. Të vetmet muaj kur ne patëm një goditje, pra që nuk ishin më të larta sesa 2018, ishte janari. Protestat e janarit i mbani mend dhe janari kishte më pak turistë. Ishte qershori me djegiet dhe me protestat dhe me gjithë atë zhurmën e madhe të krijuar në 30 qershor. Gjithë ato imazhet e djegieve që bëheshin dhe ato teatrot sikur do të digjnin Shqipërinë. Pati ndikim edhe tërmeti i shtatorit. Nëse do të kemi sërish protesta, do të ketë një impakt super negativ tek turistët dhe investitorët e huaj që vijnë në Shqipëri. Nëse protestat do të shoqërohen prapë me djegie dhe ato lojërat e kota dhe aktrimet do të ketë një impakt shumë negativ në botën e turizmit.”
Ministri bëri thirrje që të ketë një vëmendje më të shtuar tek turizmi i brendshëm. Sipas Klosit, ka ardhur koha që shqiptarët të njohin më mirë Shqipërinë dhe të mos “sulen” për të kaluar fundjava në vendet fqinje.
“Qytetarët kanë shumë pak informacion se çfarë po bëhet sot në Valbonë, në Korçë. Duhet të promovojmë një turizëm të brendshëm. Duhet të ketë më shumë pushime në rrjet të brendshëm. Kemi nevojë që ato pesë para që harxhohen për turizëm, të shpenzohen në vendin tonë. Nuk ka arsye pse të mos shkosh një fundjavë në Valbonë, në Korçë, në Theth apo Shkodër. Gjirokastra ka marrë një transformim të jashtëzakonshëm. Ka gjithë kohës sezon. Ne na duhet që gjithë shoqëria ta ndjejë këtë energjinë që ka sektori i turizmit. Duhet të njohim Shqipërinë.”
Ministria e Mjedisit dhe Turizmit ka një plan që të falenderojë edhe investitorët privatë në Shqipëri.
“Kryetarët e bashkive e kanë kuptuar që turizmi është një mekanizëm i jashtëzakonshëm ndihmues për pushtetin e tyre dhe ekonominë e zonave të tyre. Është një biznes që sot ka një super-entuziasëm sot në Shqipëri. Ne ja kemi dalë që për turizmin të flitet kaq shumë. Kryetarët e bashkive duhet t’u bëjnë një honor shumë të madh invesitorëve privatë. Ne kemi një program për ta evidentuar këtë gjë, do të evidentojmë çdo lloj investimi.”
Po ashtu, Blendi Klosi tregoi se po diskutohet me kryebashkiakët edhe për menaxhimin e vijës bregdetare dhe ndarjen se cilat zona do të jenë plazhe private dhe cilat publike.
