Ministri Mjedisit, Blendi Klosi deklaroi se falë investimeve që janë realizuar në Valbonë turizmi malor ka shënuar një hap të rëndësishëm.
Teksa inspektoi punimet në një nga investimet e bëra në këtë zonë, ministri Klosi tha se ka ardhur koha që të kuptohet se çfarë duan operatorët e zonës.
“Tashmë është e vështirë që të ndash nëse turistët e huaj që vijnë në Shqipëri, të cilët vitin e kaluar kanë qenë plot 6 milionë turistë të huaj, vijnë më shumë për detin apo vijnë më shumë për malin. Ne na duhet që të kuptojmë se çfarë duan operatorët e zonës. Në sondazhet që kemi realizuar me turistët e ardhur në Shqipëri, që kemi kategori të caktuara turistësh, të cilët nuk e duan detin shqiptar, kanë det në vendet e tyre, por ama e gjithë zona e evropës nga ku vijnë turistët dominon zonën malore. Vijnë në Shqipëri për të parë bukuritë e maleve për të parë malin e Korabit, për të shkuar në Tomorr, për të ndjekur zonën e Currajve të epërm, turistët cekë, zonën e mbi Shkodrës, pra kemi shumë pole, të cilat na duhen që t’i admnistrojmë më mirë pasi realisht prodhohet më shumë ekonomi dhe më shumë punësim”, tha ministri Klosi.
Sipas tij, pas certifikimit për herë të parë të udhërrëfyesve turistikë, ka ardhur momenti që guidat të bëhen nga njerëz profesionistë, që e njohin turizmin.
“Jemi tashmë në një fazë konsultimi me guidat profesionale të cilat bëjnë të mundur në mënyrë profesionale shoqërimin e turistëve në bjeshkë që është realisht një profesion, që ka shumë nevojë që të ketë njerëz shumë të personalizuar që njohin malin, natyrën, që dinë të japin ndihmën e shpejtë, që dinë të shpjegojnë nga pikëpamja ekologjike apo e zonave të mbrojtura, që çfarë ato ofrojnë pra të kemi njerëz që realisht t’i bëjnë njerëzit që të qëndrojnë më gjatë në vendin që vizitohet”, u shpreh ministri.
