Ministri i Turizmit dhe Mjedisit Blendi Klosi ka pajisur me certifikatën e Agroturizmit subjektin Agroturizmi Huqi.
Ky është një atraksion i jashtëzakonshëm turistik, ku mund të shijosh ushqimet tradicionale dhe bio të zonës, të vizitosh kafshët, të bësh xhiro me varkë përgjatë lumit dhe të shijosh ajrin e pastër.
Së fundmi fermës agroturistike i janë shtuar edhe 7 dhoma, ku vizitorët vendas apo turistët e huaj mund të kalojnë edhe natën, në një prej shtëpive të vogla prej druri.
“Kjo fermë agroturistike, ku jemi këtu, e familjes Huqi, është dëshmia më e gjallë se banorët e kësaj zone realisht mund të prodhojnë atë çfarë me duart e tyre të gjithë të tjerët duan të realizojnë dhe agroturizmi është një zgjidhje e mrekullueshme për të gjithë aspiratat e tyre dhe për të realizuar një ekonomi të vërtetë. Dhe tani ata e marrin certifikatën e agroturizmit që i jep një mbështetje tjetër të madhe. TVSH reduktohet nga 20 përqind në 6 përqind në gjithë shërbimet që kryen kjo strukturë agroturistike që është një diferencë shumë e madhe dhe është një favor që ne ia kemi dhënë vetëm hoteleve me 5 yje dhe tani ua dhamë edhe kompanive agroturistike se mendojmë që të dyja janë manjete të zhvillimit të ekonomisë tonë dhe po ashtu tatim fitimi ulet 5%”.
Gjithashtu në fjalën e tij ministri ka theksuar se kjo nuk është e mjaftueshme, pasi për të pritur më shumë turistë duhen shtuar kapacitet nga 7 dhoma, që janë aktualisht në 30 që është edhe maksimumi që duhet të ketë një subjekt për të qenë Agroturizëm.
Ndërkohë pronari i pronari i Agroturizmit Huqi, Gëzim Huqi, është shprehur se ka qenë skeptik për programin e qeverisë.
“Unë kam aplikuar me AZHBR vite më parë, pastaj rastësisht aplikova, u shpalla fitues dhe deri ditën që kam lidhur kontratën me AZHBR, kam qenë mosbesues, por është një dhuratë që të jepet. Ato shtëpi nuk do ishin bërë. U bëj thirrje dhe njëherë fshatarëve të mi, vlerësojeni këtë moment”.
