Këshilli Kombëtar i Territorit ka zhvilluar këtë të martë një takim ku ka kërkuar zgjerimin e Parkut Kombëtar të Tomorrit.
Në takim ishte prezent dhe ministri i Mjedisit, Blendi Klosi, i cili tha mbledhja u mbajt me qëllim rregullimin e një gabimi që ka plot ngjyra korruptive.
Klosi nuk nguroi të faqësonte në lidhje me këtë gabim ish-qeverinë Berisha, duke theksuar se vendimi I 2012 I hapi rrugë të gjithë kësaj gangrene në malin e Tomorrit.
“Jemi para vendimit të Këshillit Kombëtar të Rregullimit të Territorit për të korrigjuar një gabim që ka plot ngjyra korruptive. Vendimi i Sali Berishës i 2012 kur ka shpallur zonë të mbrojtur malin e Tomorrit ka përjashtuar në mënyrë abuzive këtë zonë këtu që pastaj u krijua e gjitha si një gangrenë për të gjithë zonën e mbrojtur të Tomorrit.”
Më tej ministri përsëriti dhe njëherë qëndrimin se Mali i Tomorrit duhet mbrojtur dhe se e gjithë katrahura e shkaktuar nga biznesi I guroreve duhet të marrë fund.
“Guroret e kanë shndërruar atë në një zonë turpi. Vendimi i bllokimit të aktivitetit nga qeveria në 2018, u rrëzua me një vendimi absurd nga Gjykata Administrative e Tiranës. Mali i Tomorrit sot është një mal që duhet mbrojtur.Kemi realizuar një diskutim me ekspertë të fushës. Garantojmë se kjo katrahurë nuk do të vijojë më në Malin e Tomorrit.”