Në mënyrën më tragjike ka përfunduar rasti i zhdukjes së dy vjeçares Danka Iliq, i cili tronditi Serbinë.
Danka e vogël u zhduk më 26 mars teksa po luante para shtëpisë së saj në fshatin Bansko Polije në Serbinë verilindore dhe presidenti serb Aleksandar Vuçiç njoftoi sot se vajza e vogël kishte vdekur.
Vdekja e saj u shkaktua nga dy punonjës të ujësjellësit, të cilët e tërhoqën zvarrë vajzën 2-vjeçare me makinën e tyre të shërbimit dhe më pas e hodhën trupin e saj të pajetë në një zonë të përdorur si një vend grumbullimi mbetjesh. Autorët janë arrestuar dhe kanë pranuar fajësinë, ka bërë të ditur presidenti i Serbisë.
Zhdukja e Dankës së vogël kishte mobilizuar autoritetet serbe, por edhe Interpolin pasi kishte dyshime se ajo ishte rrëmbyer nga shtetas të një shteti fqinj.
Në Serbi, për herë të parë funksionoi sistemi i menjëhershëm i raportimit për zhdukjen e një të mituri (Amber Alert) dhe pati një reagim të madh nga bota ndaj përpjekjeve të autoriteteve për gjetjen e dy vjeçares Danka Ilic. /vizionplus.tv
