Kina “voton” për president të përjetshëm
Kina ka miratuar heqjen e kufizimit të mandateve për udhëheqësin e saj Xi Jinping, një masë kjo që në mënyrë efektive e lejon atë të mbetet si president i përjetshëm. Ndryshimet kushtetuese u miratuan ne takimin vjetor te Kongresit Popullor Kombëtar të Kinës.
Dy delegatë votuan kundër ndryshimit dhe tre abstenuan, ndërsa 2,964 vota e miratuan atë. Kina kishte vendosur një kufizim dy mandatesh . Xi Jinping, megjithatë, sfidoi traditën e paraqitjes së një pasuesi të mundshëm gjatë Kongresit të Partisë Komuniste në Tetor.
Në vend të kësaj, ai e konsolidoi pushtetin e tij politik, ndërsa partia votoi për të ruajtur emrin dhe ideologjinë politike në kushtetutën e partisë, duke e ngritur statusin e tij në nivelin e themeluesit të saj, Mao Ce Dunit. Në fund të shkurtit, partia propozoi heqjen e kufizimit të mandateve në detyrë, nga kushtetuta e Kinës.
64-vjeçari Xi Jinping konsiderohet si udhëheqësi më i fuqishëm kinez që pas Mao Ce Dunit. Ai i ka quajtur ndryshimet kushtetuese si një reflektim të vullnetit të përbashkët të partisë dhe të popullit.
