Ritmi i shtimit të aftësive bërthamore të Kinës mund t’i mundësojë Pekinit të ketë një rezervë prej rreth 1500 mbushjesh bërthamore deri në vitin 2035. Kjo, sipas raportit vjetor të Pentagonit “Fuqia Ushtarake e Kinës” që iu dorëzua Kongresit të martën. Korrespondentja e Zërit të Amerikës në Pentagon, Carla Babb sjell hollësitë.
Një raport i ri i Pentagonit thotë se Kina ka më shumë se 400 mbushje bërthamore, duke e dyfishuar arsenalin e saj bërthamor në vetëm dy vjet.
Në raport thuhet gjithashtu se Pekini lëshoi afërsisht 135 raketa balistike për testime dhe stërvitje vitin e kaluar, “më shumë se pjesa tjetër e botës e marrë së bashku”, nëse përjashtohen raketat balistike të lëshuara në zona konflikti si Ukraina.
“Nëse vëren aftësinë dhe kapacitetin e arsenalit të raketave të Kinës, mbetesh pa frymë”, thotë Bradley Bowman me Fondacionin për Mbrojtjen e Demokracive.
Pentagoni e quan Kinën, sfidën e tij në rritje.
“Kina është i vetmi vend që gjeopolitikisht ka potencialin e fuqisë për të qenë një sfidë e rëndësishme për Shtetet e Bashkuara dhe ata janë”, thotë gjenerali Mark Milley, Shefi i Shtatëmadhorisë Amerikane.
Sipas raportit, Kina ka rritur ato që Pentagoni i quan veprime ushtarake “të pasigurta” dhe “joprofesionale” ndaj SHBA-së dhe aleatëve të saj në rajon.
Veçanërisht, siç thekson analisti i mbrojtjes Bradley Bowman, drejt ishullit demokratik të Tajvanit.
“Ata kanë refuzuar të heqin dorë nga opsioni i forcës ushtarake kundër Tajvanit, kanë refuzuar në mënyrë të qartë ta bëjnë këtë dhe po ndërmarrin veprime si ato të një vendi që është duke u përgatitur për të kryer një sulm potencial kundër Tajvanit”.
Sipas Pentagonit, sulmi mbetet një mundësi, ndonëse nuk duket të jetë i menjëhershëm, pavarësisht qëndrimeve të fundit agresive.
“Siç thekson raporti, ne nuk besojmë se është një sulm i pashmangshëm”, thotë gjenerali Pat Ryder.
Një zyrtar tjetër i lartë i mbrojtjes, u tha gazetarëve se Kina ka krijuar një normalitet të ri rreth Tajvanit për sa i përket aktivitetit ushtarak.
Menjëherë pas vizitës së Kryetares së Dhomës së Përfaqësuesve Nancy Pelosi në Tajvan në gusht, Kina shtoi stërvitjet, lëshimet e raketave dhe aktivitetin ushtarak në ngushticë.
Ato përfundimisht u ulën, por janë ende rutinë, tha zyrtari, në vend që të rezervohen për raste të rralla, siç ishte praktika e Kinës përpara vizitës.
Ministri kinez i Mbrojtjes Wei Fenghe i tha Sekretarit amerikan të Mbrojtjes Lloyd Austin në Kamboxhia javën e kaluar se Pekini e konsideron Tajvanin si një “vijë të kuqe”.
Dhe ky agresion ka vazhduar në zona si Deti i Kinës Jugore, ku aeroplanmbajtësja USS Chancellorsville përfundoi një operacion në mbështetje të kalimit të lirë në ujërat ndërkombëtare. Në këtë zonë kalon gjysma e tonazhit të mallrave të tregëtisë ndërkombëtare me një vlerë prej triliona dollarësh çdo vit.
“E di se ka pasur disa raportime se Kina në thelb e nxorri anijen tonë nga zona. Kjo nuk është e vërtetë. Përsëri, ne do të vazhdojmë të lundrojmë, fluturojmë dhe operojmë kudo që e lejon ligji ndërkombëtar”, tha gjenerali Pat Ryder.
Kina pretendon një pjesë të madhe të detit si territorin e saj dhe ka injoruar një vendim të gjykatës ndërkombëtare që thotë se Pekini nuk ka asnjë pronësi mbi Detin e Kinës Jugore.
