Serbia ka treguar forcën ushtarake në një paradë në aeroportin ushtarak të Batajnicës, pranë Beogradit, ku u ekspozua edhe sistemi kinez FK-3.
Shefi i Shtabit të Përgjithshëm të Forcave të Armatosura serbe, Milan Mojsilloviq, nënvizoi se ky sistem me rreze të mesme veprimi, do të përdoret për mbrojtjen ajrore të vendit.
Serbia pranoi dërgesën me këtë sistem të sofistikuar të mbrojtjes raketore përmes një operacioni sekret, më datë 10 prill. Një lëvizje që u pasua me reagime të forta në kohën kur ende vazhdon lufta në Ukrainë dhe armatosja e Ballkanit mund të kërcënojë paqen e brishtë të rajonit.
Presidenti serb Alexandër Vucic deklaroi se vendi po përballet me presion të madh që të vendosë sanksione kundër Rusisë por Beogradi qëndron i palëkundur në pozicionin e tij.
ALEXANDER VUCIC
PRESIDENT I SERBISE
“Në politikën ndërkombëtare nuk ka miqësi, vetëm interesat janë të përjetshme, prandaj duhet të kujdesemi për vendin tonë. Ky është një konflikt botëror, politik dhe ekonomik dhe presionet e kërcënimet po shtohen.Serbia duhet të ndjekë një politikë të përgjegjshme, një politikë zhvillimi dhe përparimi dhe të udhëhiqet ekskluzivisht nga interesat e veta.”
Këtë të mërkurë, kancelari gjerman,Olaf Scholz, do të presë në selinë e tij në Berlin kryeministrin e Kosovës, Albin Kurti, dhe më pas, presidentin e Serbisë, Aleksandar Vucic. Por kreu i shtetit serb i ka zeruar pritshmëritë për progres duke thënë se nuk mund të ketë dialog me Albin Kurtin.
“Nga takimi me kancelarin gjerman Olaf Scholz, pres të dëgjoj vërejtje për sjelljen e Serbisë. Është një mundësi e mirë që do të kemi pak kohë për të shprehur qëndrimet tona, por nuk do ta ndryshojmë qëndrimin për Kosovën dhe Metohinë, as për sanksionet ndaj Rusisë.”
Presidenti serb ka shtuar më tej se populli serb gjendet nën presion të fortë, pasi situata në Ukrainë po përdoret kundër tyre.
