Ambasadorja e SHBA-ve në Shqipëri, Yuri Kim ka treguar bisedën që ka realizuar me kryeministrin Edi Rama mbi deklaratën e bërë pak ditë më parë nga diplomatja për kandidimin e Tom Doshit në zgjedhjet e 25 prillit.
Nëpërmjet një postimi në “Twitter”, Kim sqaroi se kreu i qeverisë e ka siguruar që Doshi nuk do të ketë asnjë post në qeveri, ndërsa i ka kujtuar edhe faktin që ka qenë vetë kryeministri ai që e përjashtoi deputetin nga radhët e Partisë Socialiste.
“Më lejoni t’i jap fund spekulimeve: Kryeministri Edi Rama dhe unë kemi mirëkuptim se çfarë do të thotë emërimi. Në fakt, Kryeministri më kujtoi se ai e kishte përjashtuar personalisht këtë person nga Partia Socialiste. Ai theksoi se ky person nuk do të ketë asnjë rol në asnjë qeveri që ai formon”, shkruan Kim.
