Ju ndodh shpesh që të zgjoheni në mëngjes dhe të shikoni se diçka nuk shkon me fytyrën tuaj. Mbase keni shtim të puçrave, acarim aknesh, tharje fytyre, rrudha, dhe kjo gjë ju shton mërzinë.
Me siguri në ato momente keni menduar se është fundi ose keni bërë me mendje llogarinë e të gjitha kremërave dhe trajtimeve të shtrenjta që ”mund” t’ju ndihmojnë në një rast të tillë, por në të vërtetë zgjidhja është shumë më e thjeshtë se kaq. Në fakt “Living” sjell për ju 4 zgjidhje, 4 maska të shpejta që ndihmojnë lëkurën tuaj në çdo kohë.
1.Si të eleminoni qimet në pjesën e sipërme të buzës
Qimet e bezdisshme që rriten në pjesën e sipërme të buzës nuk janë aspak estetike dhe këtë e dinë më së miri femrat. Mënyra më e shpejtë që ju vjen ndërmend për t’i hequr është piskatorja, por kështu rrezikoni jo vetëm që të pickoni mishin, por mbi të gjitha të këpusni qimen. Maska e mëposhtmë është zgjidhja që ju duhet.
Përbërësit: 1 filxhan kafeje ujë, 30 gr miell qiqrash dhe gjysmë limoni i shtrydhur. Bashkoni të gjithë përbërësit në blender derisa të krijohet një pastë e trashë. Me ndihmën e një kunji pambuku lyeni pjesën e sipërme të buzës dhe lëreni të thahet për 15 minuta. Më pas hiqeni maskën me një peshqir të ngrohtë duke ushtruar forcë në anën e kundërt të qimes.
2.Maskë kundër rrudhave me limon dhe aspirinë
Për të realizuar këtë maskë ju duhen 3 aspirina dhe 3 lugë çaji me lëng limoni natyral. Thërrmoni aspirinat derisa të shndërrohen në trajtë pluhuri. Më pas shtoni lëngun e limonit dhe pasi masa të jetë lidhur, aplikojeni në zonën e rrudhave poshtë syve, buzës dhe tek balli.
Lëreni të veprojë në fytyrë për 10 minuta dhe më pas lani fytyrën me ujë të vakët. Gjithashtu mund ta ruani në ngrirje këtë maskë, duke formuar kubeta me të cilat mund të masazhoni fytyrën në çdo kohë.
3. Maskë gjallëruese me kos, mjaltë dhe aspirina
Përbërësit : 5 aspirina, 1 lugë gjelle kos natyral dhe 1 lugë çaji mjaltë. Siç e vini re edhe në këtë maskë nuk mund të mos mungonte aspirina, një produkt çudibërës i cili është një ndër përbërësit bazë të ritualit të bukurisë. Pasi të keni shtypur aspirinat, shtoni kosin natyral dhe mjaltin duke formuar një masë homogjene.
Para se të aplikoni këtë maskë duhet që të bëni një proces avulli, në mënyrë që të hapni plotësisht poret e lëkurës. Më pas aplikoni maskën në fytyrë dhe masazhojeni me lëvizje të shpejta rrethore. Në fund lani fytyrën me ujë të vakët dhe lyejeni me vaj bajamesh.
4. Maskë eksofiluese me aspirinë
Eksfolijimi është një hap shumë i rëndësishëm në mirëmbajtjen e lëkurës së fytyrës. Përbërësit: 3 aspirina dhe 3 lugë çaji ujë të vakët. Shtypni fillmisht aspirinat dhe bashkojini me ujin, derisa të foromohet një masë si me kokrriza.
Lani fytyrën dhe pa e fshirë akoma, aplikoni scrubin e mësipërm i cili do të depërtojë thellë në lëkurë duke hequr qelizat e vdekura dhe duke lehtësuar qarkullimin e gjakut dhe furnizuar lëkurën me oksigjen.
