Opozita ka sulmuar qeverinë në lidhje me mbledhjen e Këshillit të Stabilizim Asoccimit.
Ish-ministrja e Integrimit, Klajda Gjosha në një postim në “Facebook”, deklaroi se opozita për herë të dytë u përjashtua nga qeveria në Këshillin e Stabilizim Asoccimit.
Sipas Gjoshës, frika nga e vërteta ka sjellë çensurën dhe në pozicionet dhe instancat ku opozita ka vendin e saj.
“Këshilli i Stabilizim Asocimit për herë të dytë organizohet nga qeveria duke përjashtuar opozitën. Frika nga e vërteta tani ka sjellë çensurën edhe në pozicionet dhe instancat ku opozita ka vendin e saj të padiskutueshëm. Nëse dikush mendon që ky është një proçes i njëanshëm dhe jo gjithë përfshirës, kërkon të shkatërroj perspektivën europiane të Shqipërisë. Sa keq që qeverisemi nga njerëz të vegjël si në vizion, ashtu edhe në shpirt!”
Ndërkohë, nga ana tjetër kreu i Komisionit të Integrimit, Genc Pollo deklaroi se mbledhja e djeshme në Bruksel tregoi se qeveri mori kritikën e radhës në lidhje me luftën kundër krimit dhe kanabisit.
“Kush pretendon se dje në Bruksel, në Keshillin e Stabilizim Asocimit (KSA) qeveria Rama mori lavdërimin e rradhës nga Komisioni Europian do të ketë dëgjuar vetëm intervistat e Bushatit por nuk ka mundësi të ketë lexuar deklaratën e KSA ku pala europiane u kryesua nga Përfaqsuesja e Lartë Mogherini. Ndërkohë që në mbledhjen para një viti, më 15 nëntor 2017, znj. Mogherini “mirëpriti hapa kundër krimit e korrupsionit e suksese kundër kanabisit” në vijim të mbledhjes së djeshme u tha se ” BE ritheksoi nevojën kritike për të arritur rezultate të prekshme në luftën kundër korrupsionit në të gjitha nivelet dhe në luftën kundër krimit të organizuar veçanërisht kundër kultivimit e trafikimit të narkotikëve.”
Sipas Pollos, kjo deklaratë tregon se qeveria rilindiste po bëhet gjithnjë e më shumë pengesë për hapjen e negociatave të antarësimit.
