Ndërsa Palestina mban zi për më shumë se 60 protestuesit e vrarë nga ushtria izraelite në rripin e Gazës, nuk kanë munguar reagimet e ndërkombëtarëve të cilët i kanë dënuar ngjarjet e dhunshme.
Presidenti Macron, kryeministrja britanike Theresa May, ministri i jashtëm rus Sergei Lavrov kanë kritikuar Izraelin. Autoriteti udhëheqës i Palestinës, por edhe OKB dënoi “shkeljet e rënda të të drejtave të njeriut”.
Katari reagoi ashpër për atë qe e quajti masakër brutale dhe i bëri thirrje Këshillit të Sigurimit dhe bashkësisë ndërkombëtare të marrin përgjegjësitë e tyre lidhur me terrorizmin e Izraelit kundër palestinezëve.
Ndërsa presidenti Turk Rexhep Tayip Erdogan, akuzoi Izraelin për “genocid” dhe dënoi qëndrimin e SHBA-ve për zhvendosjen e ambasadës në Jerusalem.
Një ditë më parë Rripi i Gazës u shndërrua ne shesh beteje ku palestinezet kundërshtuan zhvendosjen e ambasadës amerikane nga Tel Aviv në Jerusalem.
Mbi 2500 persona të tjerë mbetën të plagosur, mes tyre numërohen edhe shumë gra e fëmijë.
Palestinezët shënojnë ketë të marte 70 vjetorin e katastrofës ose siç e quajnë ata, “Nakba”, që çoi në dëbimin e qindra mijëra palestinezëve nga fshatrat e tyre, ditën në të cilën Izraeli shpalli themelimin e shtetit më 15 maj të vitit 1948.
Ndërkohë Këshilli I sigurimit I OKB në një mbledhje urgjente po diskuton situatën në kufirin izraelito-palestinez.
Ambasadorja e SHBA në OKB Nikki Haley i ka konsideruar “të përmbajtura” veprimet e Izraelit ndërsa i dërguari i OKB-së për Lindjen e Mesme, Nikolai Mladenov, ka kërkuar veprim të shpejtë për ‘parandalimin e luftës’.
