Sot do të mblidhet Këshilli i Mandateve, për të shqyrtuar kërkesën e Prokurorisë së Posaçme, për heqjen e mandatit të ish-lryeministrit Sali Berisha dhe ashpërsimit të masës së tij të sigurisë nga detyrim paraqitje në arrest shtëpie.
Vetë Berisha, ende nuk ka bërë të ditur, nëse do të jetë i pranishëm para Këshillit apo do të përfaqësohet nga mbrojtja e tij. ‘Do të pyes avokatët!’, tha Berisha pak ditë më parë.
Lexo edhe :
Në përbërje të Këshillit të Mandateve është kryeparlamentarja Lindit Nikolla dhe 4 deputetë të PS, ndërkohë që në pikëpyetje është prezenca e deputetëve të opozitës, për shkak se për 4 nga 5 ndaj tyre është marrë masa e përjashtimit. Bëhet fjalë për Gazment Bardhi, Greta Bardeli, Ervin Salianji dhe Saimir Korreshi, të cilët i janë bashkuar aksionit të mbështetur nga Sali Berisha për moslejimin e zhvillimit të komisioneve parlamentare dhe seancave plenare deri në plotësimin e kërkesave të tyre për ngritjen e komisioneve hetimore.
Por, ndërsa Këshilli i Mandateve do të zhvillojë shqyrtimin e mandatit të Berishës, ky i fundit me mbështetësit e tij do të mbajë një protestë para Kryesisë së Kuvendit.
“Nuk protestojmë për personin, por protestojmë strikt për grushtin e shtetit brenda shtetit që po bën Edi Rama duke marrë pushtetin e parlamentit. Këto protesta do të jenë të pandërprera tani. Nuk ka asnjë zgjidhje tjetër.”- thotë Berisha.
Protesta do të vazhdojë edhe të enjten, kur me gjasë, do të votohet në seancë plenare dhënia e autorizimit për arrestimin e ish-kryeministrit, nëse socialistët nuk do të nxitojnë të thërrasin një seancë të posaçme më parë./vizionplus.tv
