Kryetari i Partisë Demokratike, Sali Berisha, në një konferencë për mediat ka përshëndetur protestën e zhvilluar gjatë fundjavës në Tiranë, duke e cilësuar atë si një nga mobilizimet më të mëdha qytetare në vend dhe në diasporë. Ai vlerësoi pjesëmarrjen e qytetarëve që, sipas tij, “udhëtuan nga të katër anët e Evropës dhe botës” për t’u bashkuar në protestë.
“Jam këtu për të përshëndetur përzemërsisht dhe me mirënjohje të pakufishme ata dhjetëra mijëra apo qindra mijëra qytetare dhe qytetarë… duke i dhënë Tiranës dhe kombit një det të vërtetë shprese,” u shpreh Berisha”.
Berisha akuzoi kryeministrin Edi Rama për korrupsion dhe keqqeverisje. Ai tha gjithashtu se largimi i shqiptarëve nga vendi është pasojë e qeverisjes aktuale.
“Edi Rama është i pashpresë, e bën fund e krye të pashpresë sundimin e tij,” tha ai.
Në vijim, Berisha përsëriti thirrjen për dorëheqjen e kryeministrit dhe propozoi krijimin e një qeverie teknike.
“Kërkoj dorëheqjen e menjëhershme të Edi Ramës dhe krijimin e një qeverie teknike jo politike, me ekspertë, që t’i rikthejë vendit votën e lirë,” deklaroi ai.
Ai u bëri thirrje mbështetësve të opozitës dhe qytetarëve që të vijojnë protestat, duke theksuar se “vendi i çdo demokrati është në shesh” dhe se protesta duhet të vazhdojë pa u ndikuar nga sloganet apo sulmet ndaj opozitës.
“Çdo natë vendi i tyre është në sheshin dhe rrugët e Tiranës në betejën për liri dhe për votën e lirë,” tha Berisha, duke shtuar se protesta aktuale është “qytetare” dhe duhet të shihet si e tillë, përtej ndarjeve partiake./vizionplus.tv
