Partisë Socialiste i duhet më shumë kohë për të dorëzuar raportin në kuvend, ku mazhoranca shprehet pro kërkesës së SPAK për autorizimin e arrestimit të ish zv/kryeministrit, Arben Ahmetaj.
Deputeti i Partisë Socialiste, Arben Pëllumbi, para mediave theksoi se mazhoranca nuk do të bëhet avokat i askujt. Megjithatë, ai thekson se PS mbetet për të gjykuar vetëm nëse procedurat janë ndjekur siç duhet, por nuk gjykon faktet e paraqitura.
“Duhet t’ia dorëzojmë kryetares së Kuvendit, që pastaj do t’i kalojë seancës plenare. U diskutua dhe besoj kryetarja do të vendosë që ditën e hënë në orën 17:00, të kemi një seancë të posaçme ku do të diskutohet kjo pikë. Duhet të kuptojmë që Këshilli për Mandatet dhe Rregulloren nuk është as gjykatë dhe nuk ka as tagrin që të gjykojë. Ne aty gjykojmë vetëm nëse procedura për dhënien e kësaj të drejte që kërkon organi i akuzës është zbatuar apo jo dhe ka apo nuk ka fakte që vërtetojnë që ndaj kolegut tonë ka ndikime politike apo ka probleme të tjera për të cilat kushtetuta i jep atij mbrojtje. Për sa kohë ne bindemi që procedura është e rregullt dhe nuk ka fakte të cilat të vërtetojnë që ka një tejkalim për heqje imuniteti, sigurisht ne kemi qëndrimin tonë për të mos bërë avokatin e askujt”, theksoi ai.
Nga ana tjetër, opozita ka kërkuar që drejtësisë t’i hapet rruga që të veprojë duke propozuar që parlamenti të shqyrtojë në seancën e së enjtes kërkesën e SPAK për arrestimin e Ahmetajt, pas depozitimit të raportit të Këshillit të Ministrave.
