Gjatë kësaj jave moti ka qënë i paqëndrueshëm dhe me luhatje të temperaturatave. Në ditët e para të javës patëm temperatura më të larta sesa mesatarja e stinës dhe e muajit ndërkohë që të enjten për shkak edhe të reshjeve të shiut, temperaturat janë ulur.
Sipas MeteoAlb, dita e sotme ( e premte) mbetet me kthjellime dhe vranësira të pakta, ku me të dukshme vranësirat do të jenë në zonat Malore. Po ashtu në kushte të qëndrueshme atmosferike mbetemi dhe gjatë ditës së shtunë ku kthjellimet do të jenë mbizotëruese në Ultësirën Perëndimore .
Moti i qendrueshem mbetet prezent deri në orët e mesdites së të dielës. Kjo pasi orët vijuese të dielën shtojnë vranësirat në vend dhe kemi shfaqje të reshjeve të shiut në zonat Veriore dhe pjesërisht në lindje të vendit.
Temperaturat e ajrit sot shënojnë në zonat Malore vlerat minimale 7 gradë Celcius dhe maksimalja në Ultësirën Perëndimore me 27 gradë Celcius . Në fundjave pritet rritje graduale e vlerave termike duke shenuar pikërisht shifrat 9-10 gradë Celcius tek minimalet dhe 28-29 gradë tek maksimalet.
