Dhjetra punonjës të kompanisë së sigurimit Bankers Petroleum u ngritën në protestë paraditen e sotme. Prej shtatë muajsh, ata nuk kanë marrë pagat, duke e vështirësuar ndjeshëm situatën për 120 punonjësit aktualë.
“Ne fillimisht ishim 380 punonjës, por janë bërë shkurtime të vazhdueshme”, shprehen protestuesit, duke shtuar se kjo është protesta e katërt brenda shtatë muajve.
“Jemi zhytur në borxhe dhe kredi, ndaj kjo problematikë duhet të zgjidhet sa më shpejt,” thonë ata.
Punonjësit deklarojnë se gjatë gjithë kësaj periudhe kanë pasur kontakte me drejtuesit e kompanisë, të cilët i kanë mbajtur me shpresa të kota.
“Kemi shtatë muaj pa marrë pagat. Jemi 120 punonjës, kemi qenë 380, dhe në janar filluan shkurtimet. Ne që vazhdojmë punën kërkojmë pagesat tona. Kompania thotë ‘s’kemi lekë, do t’ua japim’, por na mashtrojnë. Do vijojmë protestën çdo ditë derisa të na japin lekët”, tha një prej punonjësve.
“Akoma nuk kanë xhiruar lekët. Jemi mbledhur këtu dhe do mblidhemi çdo ditë. 7 muaj pa paga, kemi marrë borxh, jemi me kredi.”
Përballë kësaj situate, ata paralajmërojnë se do të vazhdojnë protestat, ndërkohë që do të vijojnë edhe punën, derisa problemi i pagave të marrë një zgjidhje./vizionplus.tv
