Kazakistani thotë se ka evakuuar 83 shtetas nga qyteti Vuhan i Kinës, që konsiderohet epiqendër e koronavirusit të ri.
Në Kinë, mbi 300 persona kanë humbur jetën nga virusi i ri, teksa shumë shtete, nga frika e përhapjes së këtij virusi kanë vendosur kufizime të udhëtimit për kinezët, por edhe u kanë bërë thirrje shtetasve të tyre që të shmangin udhëtimet drejtë Kinës.
Qeveria e Kazakistanit njoftoi sot se 80 nga 83 shtetasit kazak, që janë evakuuar nga Kina janë studentë.
Në deklaratën e qeverisë thuhet se edhe një numër i kirgizëve, bjellorusëve dhe armenëve janë transportuar me aeroplanin e njëjtë me të cilin janë evakuuar shtetasit kazak.
Personat e evakuuar pritet që të qëndrojnë në karantinë për 14 ditë.
Ministria e Shëndetësisë në Kazakistan tha më 31 janar se 41 persona në vend ishin testuar për të parë nëse janë të prekur nga koronavirusi./ REL
