Besimtarët katolikë kremtojnë sot Pashkën, festën që shënjon ringjalljen e Krishtit.
Për shkak të masave si pasojë e pandemisë së koronavirusit, mesha e Pashkës është zhvilluar pasditen e së shtunës dhe jo në mesnatë, siç ka ndodhur tradicionalisht. Megjithatë, ndryshe nga një vit më parë, kur pashkët u kremtuan në kishat e katedralet e boshatisura, këtë herë, besimtarët kanë marrë pjesë në meshë.
Mesazhi i parë që Kryeipeshkvi i Kishës Katolike në Shqipëri, Imzot George Frendo përcolli në këtë festë të rëndësishme për besimtarët katolikë, ishte mesazhi i dashurisë.
Por imzot Gerge Frendo nuk ka lënë jashtë vëmendjes edhe zgjedhjet parlamentare të 25 prillit, duke iu bere thirrje politikanëve për një fushatë dinjitoze.
“U bëj thirrje kandidatëve të bëjnë një fushatë zgjedhore të pastër, dinjitoze, pa e ulur nivelin në fyerje, sharje, poshtërime, të karakterit personal apo familjar.”
Të gjithë krerët e shtetit dhe liderët e partive politike kanë zgjedhur rrjetet sociale për të uruar besimtarët katolikë për festen e pashkëve.
