Shteti i vogël i pasur i Katarit do të largohet më 1 janar nga organizata OPEC, me synimin që të fokusohet tashmë në prodhimin e gazit natyror. Lajmi është dhënë këtë të hënë nga ministri i energjisë.
Katari ka qenë anëtar i OPEC-ut që prej vitit 1961.
Ai, do të vazhdojë gjithsesi të prodhojë naftë dhe do të synojë të arrijë marrëveshje me vende të tjera.
Megjithatë, prioriteti kryesor do të jetë prodhimi i gazit pasi ky vend konsiderohet si eksportuesi më i madh në botë i gazit natyror të lëngshëm që zë rreth 30% të kërkesës globale.
Për një vit e gjysmë, Katari ka qenë nën një embargo ekonomike nga disa prej fqinjëve përfshirë Arabinë Saudite.
Katari do të jetë vendi i parë i Lindjes së Mesme që do të tërhiqet nga OPEC. Te gjithë anëtarët së bashku prodhojnë rreth 44% të naftës bruto të botës.