Votuesit në rajonin spanjoll të Katalonjës, i dhanë një goditje të rëndë Madridit, duke mbështetur partitë pro pavarësisë në zgjedhjet rajonale.
Ish-presidenti katalanas i shkarkuar nga kryeministri i qeverisë qendrore spanjolle, Mariano Rahoj, festoi rezultatet nga Brukseli.
“Qeveria spanjolle u mund”, tha Piudgemont, i cili ndodhet në Bruksel për shkak të kërkesës së Madridit për arrestimin e tij, referendumit të cilësuar të paligjshëm, dhe shpalljes së pavarësisë së rajonit nga Spanja.
Me më shumë se 99% të votave të numëruara, asnjë parti nuk fitoi e vetme shumicën, por tre forcat separatiste së bashku siguruan 70 vende, edhe pse nevojiten vetëm 69 për të krijuar mazhorancën në Parlamentin prej 135 vendesh.
Partia “Qytetarët”, e cila kërkon që Katalonja të vazhdojë të jetë pjesë e Spanjës, ka marrë numrin më të madh të votave si forcë e vetme.
Sipas ligjit, mandati për të formuar qeverinë i shkon kësaj force, me 38 të tilla. Por partitë pro ndarjes, mund të kërkojnë gjithashtu të drejtën e formimit të qeverisë, pasi kanë numrat për krijimin e ekzekutivit.
Ndërsa partia popullore e Kryeministrit Rahoj, humbi shumicën e vendeve të saj në zgjedhjet e së enjtes, duke rënë nga 11 në tre.
Qeveria spanjolle thirri zgjedhjet e parakohshme të jashtëzakonshme dhe shkarkoi qeverinë rajonale, me shpresën se do të mund të humbte ndikimin e saj në rajon, por që ne fakt thelloi krizën politike.
