Deputeti i 61, Kastriot Rexhepi përmes një videoje në rrjetin social facebook deklaroi se është në vend të sigurt dhe në anën e duhur, duke mbështetur shqiptarët dhe evropianizimin e vendit.
KASTRIOT REXHEPI
DEPUTET, LEVIZJA “BESA”
“Jam mirë, në vend të sigurt dhe në anën e duhur. Siguria dhe paqja e vendit duhet të jetë gjëja më e rëndësishme dhe Bilall Kasami nuk duhet të shqetësohet për mua, sepse jam me shqiptarët dhe me ndërkombëtarët. Do të paraqitem para mediave sapo të kalojnë disa rreziqe për jetën time, sepse jam kërcënuar nga disa persona.”
Rexhepi nuk ishte i pranishëm në seancën e sotme parlamentare ku do të votohej mocioni i mosbesimit për rrëzimin e qeverisë Zaev e ndërmarrë nga VMRO-DPMNE me mbështetjen e opozitës shqiptare dhe të majtës ekstreme. Reagimi i tij pason denoncimin e liderit të lidhjes “BESA” për rrëmbimin e deputetit.
BILALL KASAMI
KRYETAR, LEVIZJA “BESA”
“Ky regjim është i gatshëm për gjithçka për të mbetur në pushtet. Sa i përket qëndrimit të deputetit Kastriot Rexhepi, unë deri tani nuk kam patur komunikim me deputetin. Kam dyshime të bazuara se deputeti mund kundër vullnetit të tij të jetë i ndaluar, derisa nuk kam qëndrim të tij me figurë dhe me zë, ku ai deklaron se ky është pozicioni i tij dhe këtë pozicion e ka në bazë të vullnetit të mirë. Dyshimet janë se ai pa vullnet e ka këtë qëndrim, derisa nuk e kemi të kundërtën dhe për këtë jam në komunikim me institucionet e vendit dhe ndërkombëtare. Nuk kemi informata se ku gjendet. Herën e fundit kemi komunikuar gjatë ditës së djeshme. Nuk kam pas ndonjë sinjal që ai do të vepronte ndryshe”.
Koha për votimin e mocionit të mosbesimit përfundon në mesnatë ndërsa deri më tani nuk ka sinjale që opozita të ketë siguruar votën e 61. VMRO-DPMNE ka 44 deputetë, koalicioni Aleanca për Shqiptarët dhe Alternativa 12, E Majta 4 ndërsa Lëvizja BESA pa Kastriot Rexhepin tashmë ka mbetur me 2 deputetë.
