Ashtu si vendet e tjera te prekura nga koronavirusi, Shqiperia po vuan pasojat e shkaktuara ne turizem. Kete vit, duket se shpresa me e madhe eshte te pushuesit vendas dhe tek ata qe vijne nga Kosova.
Në një lidhje direkte me edicionin qendror të lajmeve në Vizion Plus, teksa foli për sfidat e sezonit turistik në kushtet e pandemisë, kryetari i Unionit Turistik Shqiptar, Rrahman Kasa deklaroi se Shqipëria këtë sezon është vizituar vetëm nga turistë kosovarë.
Ai u shpreh se partnerët e BE-së që kanë operuar gjatë 4-5 vitet e fundit në Shqipëri po diskutojnë datën 14 korrik për të sjellë chartera me turistë nga Polonia dhe vendet nordike. Por, Kasa theksoi se ende nuk është përcaktuar zyrtarisht, për shkak të rritjes së numrit të të infektuarve me koronavirus ditët e fundit në vendin tonë.
“Duke iu referuar vitit të kaluar, deri tani anulimi është zero. Çdo gjë është e anuluar. Nuk ka biznes, sa i përket biznesit të huaj. Deri tani nuk kemi fare turistë të huaj, perveç 3 a 4 charterave që kanë ardhur nga Bjellorusia. Turistët e vjetër janë nga Kosova, pra turistët patriotikë. Kjo nuk është zgjidhje. Për momentin, fuksionon vetëm për fundjava. Kam frikë se ky sezon do të funksionojë i tillë. Do të kemi një lloj turizmi në kushtet që jemi, sidomos rajonal, maksimumi. Do të kemi turizëm diku tek 25 për qind krahasuar me vitin e kaluar. Akoma jemi në diskutime me partnerët që kanë operuar në Shqipëri 4 deri në 5 vitet e fundit. Ata kanë planifikuar një datë që është 14 korriku për të filluar fluturimet me aeroportin e Rinasit për linjat e dedikuara charter, kryesisht do të vijnë nga Polonia dhe vendet nordike. Por, kjo datë është në pikëpyetje për shkak të rritjes së numrit të të infektuarve në vendin tonë. Ne i kemi të hapura portat. Fjala është për partnerët tanë.”
Ai nënvizoi se shifrat e raportuara së fundmi nga Ministria e Shëndetësisë i tremb turistët e huaj, ndërsa mori shembullin e Italisë, për të cilën tha se autoritete atje kanë deklaruar shifra më të ulëta me qëllim për të mos dëmtuar turizmin.
“Më bën përshtypje se Italia me 70 mln banorë deklaron raste shumë më pak. Ndërsa Shqipëria, në pikun e turizmit deklaron 70 veta me koronavirus. Në kohën kur ishte kulmi, deklaronin shumë më pak shifra sesa sot. Ndërkohë, sot, kur turizmi është shumë i ndjeshëm, ne deklarojë shifra të tilla, të cilat i trembin turistët e huaj. Disa vende që mbahen vetëm me turizmin, tashmë deklarojnë numra shumë më të ulët të rasteve. Unë jam i sigurt që atje nuk janë ato numra që deklarojnë ata, por autoritetet atje i deklarojnë të ulëta për të mos dëmtuar turizmin.”
