Një operacion i zhvilluar nga Policia e Durrësit ka çuar në goditjen e një rasti të prodhimit dhe shitjes së lëndëve narkotike. Në kuadër të operacionit të koduar “Banesa”, u arrestua në flagrancë një 30-vjeçar, i cili dyshohet se posedonte dhe shpërndante lëndë narkotike.
Sipas burimeve zyrtare, në pranga ra shtetasi me iniciale E. K., banues në Durrës. Arrestimi i tij u bë pasi shërbimet e Policisë, bazuar në informacione operative, ndërhynë në një banesë të pabanuar në lagjen nr. 8, ku ai kishte fshehur drogën.
30-vjeçari u kap në momentin që po tentonte të merrte lëndën narkotike të fshehur. Gjatë kontrollit, uniformat blu sekuestruan rreth 8 kilogramë lëndë të dyshuar narkotike të llojit Cannabis Sativa, e cila u mor në cilësinë e provës materiale.
Policia bën me dije se hetimet vijojnë për zbardhjen e plotë të rastit dhe identifikimin e personave të tjerë të mundshëm të përfshirë në këtë aktivitet kriminal.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme lidhur me veprën penale “Prodhimi dhe shitja e narkotikëve”.
/vizionplus.tv
