Në një aksion blic, forcat speciale italiane kanë ndaluar në provincën e Salernos ne jug te Italisë një shtetas algjerian i identifikuar si Xhamal Quali, i cili dyshohet se ka falsifikuar dokumentet për autorët e sulmeve në Bruksel dhe Paris. Kuali ka refuzuar të flasë për autoritetet italiane. Këta të fundit janë vënë në gjurmët e 40-vjeçarit algjerian, pasi emri i tij gjendej në disa dokumenta gjatë kontrolleve të të dyshuarve për terrorizëm në një apartament në Bruksel, tetorin e kaluar. Mes personave që kanë siguruar një dokument të tillë nga Kuali është dhe i vetmi terrorist i mbetur i gjallë, Salah Abdeslam, i cili është i arrestuar nga policia belge. Ndërkohë tre ndalime janë bërë dhe në dy shtete të tjera europiane. Dy persona janë arrestuar nga policia në Bruksel, si të dyshuar për terrorizëm. Kapja e tyre vjen pak pas dëshmisë që dhanë 9 prej të ndaluarve gjatë operacioneve që janë kryer që prej të enjtes në kryeqytetin belg. Sipas policisë, disa prej tyre më pas janë lënë të lirë. Ndërsa hetimet vijojnë, aeroporti në Bruksel do të qëndrojë ende i mbyllur në një kohë që siguria në ambientet publike apo centralet atomike është blinduar nga forcat e rendit. Edhe në Holandë njësitë antiterroriste kane arrestuar 32-vjeçarin francez i identifikuar si Anis B, në Roterdam. Ndalimi i tij është bërë pas një kërkese për arrest nga policia franceze. Ai dyshohet se po përgatiste sulme të reja në Francë. Të dielën, ministri francez i brendshëm, Kaznëv tha se Franca vazhdon të qëndrojë në gjendja të lartë të alarmit nga frika e sulmeve të reja.
