Policia e Shkodrës ka arrestuar një 22-vjeçar të akuzuar si bashkëpunëtor i autorit në vrasjen e Valter Fierzës, ngjarje e ndodhur në shtator të vitit të kaluar në Shkodër.
Në pranga ka rënë Aleksandër Mhilli, i cili është kapur në afërsi të Dobraçit.
Më herët, gjykata kishte vendosur masën “arrest me burg” në mungesë për të, për veprat penale “Moskallëzimi i krimit”, “Përkrahja e autorit të krimit” dhe “Prodhimi dhe shitja e narkotikëve”. Në momentin e arrestimit, të riut i është gjetur një thikë me vete.
Valter Fierza u vra më 21 shtator 2023, pas një konflikti për parkimin në fshatin Hot i Ri. Ai kishte shkuar për të sqaruar një sherr mes të vëllait të tij dhe fisit Mhilli, por sapo zbriti nga makina, u qëllua me armë zjarri nga Klodian Mhilli.
Klodian Mhilli u vetëdorëzua në polici në mars të këtij viti. Në lidhje me këtë krim është arrestuar më herët edhe vëllai tjetër i autorit, Paulo Mhilli.
Njoftimi:
Në vijim të kontrolleve për kapjen e shtetasve të shpallur në kërkim, bazuar dhe në inteligjencën policore për një shtetas në kërkim që qarkullonte me automjet në rrugë në fshatin Dobraç, menjëherë shërbimet e Forcës së Posaçme “Shqiponja”, organizuan punën dhe si rezultat kapën e ndaluan shtetasin Aleksandër Mhilli, 22 vjeç, banues në fshatin Hot i Ri.
Gjykata e Shkallës së Parë e Juridiksionit të Përgjithshëm Shkodër ka caktuar ndaj 21 vjeçarit masën e sigurisë “Arrest në burg”, për veprat penale “Moskallëzimi i krimit”, “Përkrahja e autorit të krimit”, dhe “Prodhimi dhe shitja e narkotikëve”
22-vjeçari ishte shpallur në kërkim i dyshuar si bashkëpunëtor në lidhje me ngjarjen e ndodhur më 21.09.2023, në fshatin Hot i Ri, ku për shkak të një konflikti të çastit, jashtë një lokali, mbeti i vrarë me armë zjarri shtetasi V.F.
Në cilësinë e provës materiale është sekuestruar një mjet prerës (thikë) që e kishte me vete.
Materialet procedurale i kaluan Prokurorisë, për veprime të mëtejshme. /vizionplus.tv
