Kaos, përplasje dhe molotov gjatë protestës, 10 policë të lënduar

TIRANË– 10 efektivë policie kanë mbetur të lënduar gjatë protestës së sotme të zhvilluar nga opozita.

Protestuesit, të cilët u nisën nga selia e PD-së fillimisht u pozicionuan para kryeministrisë ku hodhën bomba molotov. Më pas ata vijuan rrugën drejt selisë së PS-së dhe ministrisë së Brendshme. Pasi hodhën molotovë në stacionet e urbaneve dhe kazanët e mbeturinave, ata u pozicionuan para bashkisë ku sërish hodhën molotovë.

Policia e Shtetit u bën thirrje qytetarëve të ndalojnë sulmet me molotov e lëndë piroteknike mbi Policinë dhe institucionet shtetërore.

Policia e Shtetit

Shërbimet e Policisë janë të angazhuara maksimalisht për mbrojtjen e institucioneve shtetërore, pronën publike dhe private, jetën e qytetarëve dhe të vetë punonjësve të Policisë.

Që prej fillimit të tubimit një pjesë e qytetarëve në tubim sulmuan e vijojnë te sulmojnë Policinë dhe godinat e institucioneve shtetërore me molotov e lëndë plasëse.

Deri në këto momente nga sulmet e qytetarëve në tubim, me molotov, lëndë piroteknike e sende të forta  ndaj Policisë, janë dëmtuar 10 punonjës Policie.

Policia e Shtetit iu bën thirrje qytetarëve pjesëmarrës në tubim, të ndalojnë sulmet me molotov e lëndë piroteknike mbi Policinë dhe institucionet shtetërore.

Policia ka marrë të gjitha masat për identifikimin, kapjen dhe shoqërimin e personave të përfshirë në sulme mbi Policinë dhe institucionet shtetërore./vizionplus.tv