Pas kthimit në atdhe të katër fëmijëve dhe një gruaje nga kampi Al-Hawl në Siri, shpresa se do të riatdhesohen dhe persona të tjerë është rritur së tepërmi tek ato familje, pjestarët e të cilave prej vitesh ndodhen të bllokuar në zonat e luftës.
Asije dhe Dylber Shuli, nga fshati Zagorçan në Pogradec prej 7 vitesh po përpiqen që të kthejnë në shtëpi pesë nipërit e mbesat e tyre. Mes lotësh, dy të moshuarit rrëfejnë se më e madhja prej tyre është 17 vjeç dhe është e martuar në kamp.
E shqetësuar mbi fatin e nipërve e mbesave, Asija tregon se prej tre ditësh ka humbur kontaktin dhe nuk po mundet dot që të lidhet me ta.
Me shpresën se një ditë do i bashkohen familjes, dy të moshuarit apelojnë institucionet shtetërore që të vazhdojnë punën për kthimin e të gjithë fëmijëve të bllokuar në kampin sirian.
Sipas burimeve, në kampin Al-Haël ndodhen 20 gra e fëmijë vetëm nga bashkia e Pogradecit.