Kryeministri kanadez Mark Carney njoftoi sot se Kanadaja ka njohur zyrtarisht Shtetin e Palestinës, duke u bërë vendi i parë anëtar i G7 që njeh shtetin palestinez. Në një postim në llogarinë e tij në X, Carney deklaroi: “Kanadaja njeh Shtetin e Palestinës dhe ofron mbështetje për ndërtimin e një të ardhmeje paqësore, si për Palestinën ashtu edhe për Izraelin.”
Pas Kanadasë, Australia konfirmoi gjithashtu njohjen e shtetit palestinez. Kryeministri australian Anthony Albanese theksoi se ky është një hap i përbashkët me Kanadanë dhe Britaninë, dhe pjesë e një përpjekjeje ndërkombëtare për të arritur një zgjidhje me dy shtete.
Lexo edhe :
Britania e Madhe iu bashkua kësaj nisme, me kryeministrin Keir Starmer që njoftoi njohjen e Shtetit të Palestinës. Ai deklaroi: “Sot, për të rikthyer shpresën për paqe dhe një zgjidhje me dy shtete, konfirmoj me bindje se Mbretëria e Bashkuar njeh zyrtarisht Shtetin e Palestinës.”
Starmer theksoi se kjo vendimmarrje vjen në një kohë kur konflikti në Lindjen e Mesme po përkeqësohet, dhe shprehu angazhimin për të mbajtur gjallë mundësinë e paqes.
View this post on Instagram
Ai bëri thirrje për lirimin e menjëhershëm të pengjeve të mbajtura nga Hamasi dhe theksoi se njohja e Palestinës nuk është një shpërblim për këtë organizatë.
“Hamasit nuk i takon asnjë rol në qeverisje apo në siguri dhe nuk ka të ardhme,” shtoi ai.
Kryeministri britanik bëri gjithashtu thirrje që Izraeli të lehtësojë kufizimet në kufirin me Gaza dhe të lejojë futjen e ndihmave humanitare për civilët në zonë./vizionplus.tv
