Kamerat inteligjente në shkolla: çfarë funksioni do të kenë, ku do të shkojnë të dhënat, kush i kontrollon ato? Kjo ka qenë tema e emisionit të sotëm “Quo Vadis” të moderatores Pranvera Borakaj në Vizion Plus.
I ftuar në studio, avokati Asllan Dogjani tha se ky është një projekt i rrezikshëm, i cili vë në rrezik të dhënat kombëtare.
Sipas tij, sot nuk ka transparencë se kush do t’i kontrollojë të dhënat e shqiptarëve.
Pjesë nga biseda:
Borakaj: Pse jeni kundër një iniciative të tillë?
Dogjani: Duhet ta rrëzojmë këtë lloj vëzhgimi masiv.
Borakaj: Mund ta rrëzojmë tani?
Dogjani: Patjetër.
Borakaj: Pse është i rrezikshëm?
Dogjani: Duhet të informojmë qytetarët se çfarë është ky projekt. Unë e kam kundërshtuar jo vetëm për vlerat, por edhe për pasojat. Kjo është një kompani shqiptare në bashkëpunim me qeverinë dhe me Emiratet e Bashkuara, me një projekt prej 118.5 milionë dollarësh, ku do të vendosen 5 mijë kamera fillimisht në Tiranë, pastaj në 20 qytete. Do të thotë se ky projekt ka filluar të zbatohet. Unë kam kërkuar në Komisionin e Sigurisë një marrëveshje transparente, që të kuptohet çfarë parashikon marrëveshja. Ne e dimë që të dhënat do të shkojnë në Emiratet e Bashkuara Arabe. Edhe fëmijët do të rriten me ndjenjën e monitorimit, mësuesi do të jetë i monitoruar gjatë gjithë kohës. Pra, përveç vlerës, këto të dhëna merren dhe përpunohen në Emiratet e Bashkuara.
Borakaj: Ku e keni sigurinë e informacionit?
Dogjani: Gjatë diskutimit të ligjit doli kjo. Ama këto të dhëna ne nuk e dimë me kë ndahen dhe ku shkojnë. Kushtetuta e Shqipërisë dhe ligji për mbrojtjen e të dhënave kanë detyrime të qarta. Kushtetuta nuk të lejon të çosh të dhënat e fëmijës tim në Emiratet Arabe. Ku e di unë që nesër këto të dhëna nuk do të përdoren për shantazh nga mafia apo grupe kriminale? Ne nuk e dimë se çfarë rreze ka kjo kamera. Këto kamera mund të përgjojnë presidentin, mund të më përgjojnë mua në dhomën e gjumit. Këto kamera janë rrezik kombëtar, ne e kemi për detyrë të sensibilizojmë. Sinqerisht, është një kanosje e drejtpërdrejtë ndaj qytetarëve.
