Sociologia Eva Sinanaj, e ftuar këtë të martë në “Quo Vadis” të moderatores Pranvera Borakaj në Vizion Plus, ka analizuar projektin për kamerat inteligjente në shkolla.
Sinanaj tha se ky projekt nuk e rregullon dhe as nuk e përmirëson të ardhmen e fëmijëve. Sipas saj, sot shoqëria shqiptare ka nevojë për më shumë ndërgjegje qytetare, pasi është ajo që i mungon.
“Të gjithë ne teorikisht e duam Shqipërinë më të mirë. Por Shqipëria më e mirë dhe më e shëndetshme, që ka shoqëri të shëndetshme, është shoqëria e ndërgjegjshme, që fillon që në familje. Kamerat do të jenë një kontroll. Kontrolli nuk e zëvendëson edukimin. Nëse kjo përdoret si mjet për të thënë se jeta jonë do të jetë më e mirë pas kësaj, kjo nuk është e vërtetë. Fëmijët tanë do të jenë më të frustruar, do të zbatojnë rregullat për shkak të frikës që kanë. Do të jetë vazhdim i sigurisë përmes frikës”, tha Sinanaj.
