Analisti Shpend Gashi e ka cilësuar të rrezikshëm dhe aspak normale vendosjen e kamerave inteligjente në çdo shkollë shqiptare.
I ftuar në studion e “Quo Vadis” të moderatores Pranvera Borakaj në Vizion Plus, Gashi tha se sot qeveria duhet t’i japë më shumë rëndësi arsimit dhe jo survejimit.
“Unë nuk jam ekspert i fushës, por kam indinjatën time si qytetar. Është shumë e thjeshtë që në një vend ku ka njësi shërbimi të ketë kamera, sepse mund të vijnë vandalë dhe të dëmtojnë pronën. Por të vendosësh kamera në çdo cep të Shqipërisë është sikur të rrisësh fëmijën me dhunë. Të rrisësh një qen duke e rrahur, me pretendimin se ky nuk kafshon ndonjëherë. Një fëmijë i dhunuar, sapo del nga familja, shkon në rrugë të keqe. Nëse ecim me mentalitetin e kohës së qepës, që në emër të sigurisë të shkatërrojmë Kushtetutën, mua kjo më kujton Orwell-in: ‘Paqja është luftë, lufta është paqe’. Ne nuk kemi arsim digjital. Ti na rregullo njëherë mënyrën e jetesës, po jetojmë si në Xhibuti. Ndryshe nga ne, Xhibuti ka 1 milion afrikanë dhe 3 milionë të bardhë. Këto ‘tango’ që po përpiqet të krijojë qeveria është një idiotësi e paparë. Nuk jam kundër kontrollit, por jam kundër vendosjes së ‘mëlçive të ujkut në qafë’. Ç’më bën mua të mos ngre dyshimin që edhe këto kamera do të përdoren nga sulme iraniane dhe nga vetë shteti ndaj nesh?”, tha Gashi.
